LUCENA CITY, Philippines – Labinglima katao kabilang ang isang doktor at tatlong bata ang nasugatan makaraang aksidenteng sumalpok sa puno ng niyog ang sinasakyan ng mga itong pampasaherong jeepney sa bayan ng Sampaloc, Quezon kamakalawa.Kasalukuyang nilalapatan ng lunas ngayon sa pinakamalapit na pagamutan ang mga biktimang sina Dr. Jesus M. Calayan, Jennifer Salayo 6, Carl Lawrence Madrigal,10; Amica Velasco, 3; Betty Bien; Angelica Felismino, 15; Marjorie Florido, 34; Aileen Aranillo, Dorabhel Salayo, Grace Madrigal, Chona Anareta, Rodolfo Leonido, Maribelle Aranillo, Joy Velasco at driver na si John Nilmar Rejano. Sa imbestigasyon ni PO2 Silvestre Araja, naganap ang insidente sa kahabaan ng Quezon Avenue, Brgy. Bayongon, Sampaloc, Quezon dakong ala-1:35 ng madaling araw. Kasalukuyang bumabagtas sa lugar ang pampasaherong jeepney (DWR -564) na minamaneho ni Rejano patungo sa kabayanan ng Sampaloc nang mangyari ang sakuna. Nawalan umano ng kontrol sa manibela ang driver matapos na masiraan ang preno ng jeepney na naisalpok nito sa puno na ikinasugat ng mga biktima na mabilis namang isinugod sa pagamutan.