MANILA, Philippines - Brutal ang sinapit ng dalawang paslit na magkapatid kabilang ang isang 1-anyos na batang babae matapos patayin sa sakal at lunurin pa sa kanal ng 24-anyos na sarili ng mga itong ina na umano’y bangag sa droga sa bayan ng Hinigaran, Negros Occidental, ayon sa ulat kahapon.
Ayon sa Negros Occidental Police, kapwa naninigas at umaalingasaw na ang bangkay ng mga biktimang sina Carmela, 1-anyos at Violy Mae, 3 taong gulang na tinabunan pa ng dahon ng saging sa tubuhan nang madiskubre kamakalawa sa isang taniman ng tubo sa Brgy. Calapi, Hinigaran ng lalawigang ito.
Arestado naman ang suspek na si Mira Lacson, hiwalay sa asawa, walang hanapbuhay na ngayo’y nahaharap sa kasong parricide sa dalawa nitong anak sa magkaibang ama dahilan sa kasasama sa mga tambay.
Base sa imbestigasyon, naiirita umano si Mira na isang hinihinalang sugapa sa droga sa kanilang lugar dahilan sa tuwing aalis ito ng bahay para sa kaniyang mga bisyo ay umiiyak at humahabol ang kaniyang mga anak.
Nitong Lunes dakong ala-1 ng hapon ay aalis sana ang ginang pero dahilan sa umiiyak ang mga bata ay pinagsabihan siya ng kaniyang mga magulang na kung di paawat sa pagiging ‘happy go lucky’, ay bitbitin ang kaniyang mga anak sa paggala nito.
Gayunman, matapos ang ilang araw nang umuwi ang ginang ay hindi nito kasama ang mga bata kaya kinutuban ang kaniyang mga magulang at hinanap ang mga apo sa tulong ng mga barangay tanod na humantong sa taniman ng tubo kung saan isinagawa ang krimen.
Sa presinto, inamin naman ng ginang na nilunod niya sa kanal at pinatay sa sakal ang kaniyang mga anak dahilan sa abala ang mga ito sa kaniyang mga paggala kasama ang tambay na hinihinalang adik sa kanilang lugar.