BULACAN, Philippines - Kamatayan ang sumalubong sa 36-anyos na rider habang malubha naman ang kaangkas na kapatid nito matapos sumalpok ang kanilang motorsiklo sa 10-wheeler truck na sinasabing iligal na nakaparada sa provincial road sa Barangay Caingin sa bayan ng Bocaue, Bulacan kahapon ng madaling araw. Kinilala ang nasawi na si Rodel Polintan habang ginagamot naman sa ospital si Ronnie Polintan 40, kapwa sub-agent ng Intercity Industrial Estate at kapwa nakatira sa Nortville 5, Brgy.Batia habang arestado naman ang drayber ng trak na si Rogelio Salcedo. Ayon kay SPO1 Ferdinand Cabuhat, ang trak (NNE 124) ay ipinarada ni Salcedo sa madilim na kurbadang kalsada na walang anumang warning device kaya hindi napansin ng biktima. Pormal naman kakasuhan ang driver ng trak habang ito ay nakakulong.