BULACAN, Philippines – Tinatayang aabot sa P1 milyong halaga ng asukal na lulan ng trak ang hinaydyak ng dalawang kalalakihan na nagpakilalang pulis sa bayan ng Pulilan, Bulacan kahapon ng madaling-araw. Sa inisyal na imbestigasyon ng pulisya, lumilitaw na nagpapahinga ang driver na si Maximo Serwit Jr. at kasamang pahinanteng si Noel Gacutan mula sa biyahe sa Port Area, Manila nang lapitan ng dalawang lalaki na nagpakilalang pulis. Walang nagawa sina Serwit at Gacutan matapos tutukan ng baril kung saan inutusan sila na dalhin ang 10-wheeler truck (NNS 255) na kargado ng asukal na dalhin sa bahagi ng Barangay Tabe sa bayan ng Guiguinto. Inabando sina Serwit at Gacutan sa nabanggit na bayan habang ang kargamento naman ay tinangay ng mga hijacker.