BULACAN, Philippines – Dalawang armadong lalaki na sinasabing notoryus na holdaper ang bumulagta matapos makabarilan ang mga operatiba ng pulisya sa Barangay Batia sa bayan ng Bocaue, Bulacan kahapon ng hapon. Lumilitaw na hinoldap ng dalawa ang kolektor ng money lending na si Joel Del Rosario matapos maningil ng pautang sa ilang residente sa nabanggit na barangay. Natiyempuhan naman ng mga tauhan ni P/Senior Supt. Fernando Mendez Jr. ang dalawang holdaper kaya nagkahabulan hanggang sa mauwi sa shootout kung saan duguang bumulagta ang dalawa na kasalukuyan pang inaalam ang pagkakakilanlan. Narekober naman ang dalawang baril, P35,000 koleksyon ni Del Rosario at motorsiklo.