BULACAN, Philippines – Napaslang ang dalawang kalalakihan na sinasabing notoryus na kawatan ng motorsiklo matapos na makipagbarilan sa mga operatiba ng pulisya sa Sitio Bagong Sikat, Barangay Tabang sa bayan ng Plaridel, Bulacan kahapon ng madaling-araw. Ayon kay P/Senior Supt. Fernando Mendez Jr. inaalam pa ang pagkakakilanlan ng dalawang napatay habang narekober naman ang motorsiklo na pag-aari ni Ernesto Soon Jr. 36, ng Barangay Parulan. Sa imbestigasyon ni P/Supt. Julius Ceasar Domingo, inagaw ng dalawa ang motorsiklo ng biktima sa kahabaan ng Cagayan Valley Road sa Barangay Tabang. Lingid sa kaalaman ng mga karnaper ay naitimbre na sa pulisya ang kanilang modus operandi kaya inilatag ang checkpoint. Imbis na huminto sa checkpoint ay nakipagbarilan sa pulisya hanggang sa mapatay ang dalawang karnaper.