MANILA, Philippines - Bulagta ang apat na rebeldeng New People’s Army kabilang ang kanilang lider makaraang makasagupa ang tropa ng militar sa liblib na bahagi ng Sitio Tamale, Barangay Digmala sa bayan ng Bongabon, Nueva Ecija noong Huwebes ng gabi.
Kinilala ni Army’s 7th Infantry Division spokesman Major Enrico Gil Ileto ang napatay na lider ng NPA na si Benjamin Peralta alyas Gani/Otoy at Onil, kalihim ng kilusang rebelde; isang tinukoy na alyas Sara habang ang iba pa ay inaalam ang pagkakakilanlan.
Bandang alas-9 ng gabi nang makasagupa ng tropa ng 81st Infantry Battalion ni 1st Lt. Saturnino Enofre ang grupo ng mga rebelde.
Narekober sa pinangyarihan ng bakbakan ang M16 rifle, carbine rifle, cal.45 pistol, 2-improvised explosive device, 2 granada, food stuffs, mga gamot at mga subersibong dokumento.
Sinabi naman ni Brig. Gen. Alan Luga, commander ng Army’s 7th Infantry Division na isa itong malaking dagok sa hanay ng NPA.