KIDAPAWAN CITY, Philippines - Natagpuan ng pulisya ang pugot na ulo na sinasabing itinapon sa liblib na bahagi ng Sitio Kurbada sa Barangay Poblacion sa bayan ng Bansalan, Davao del Sur kahapon ng umaga. Hindi naman matiyak ng Bansalan PNP ang pagkakilanlan ng pugot na ulo kung lalaki; o kaya babae dahil sa naagnas na ito. Ayon kay P/Inspector Jose Almata, ang lugar kung saan natagpuan ang pugot na ulo malapit sa sementeryo ng Bansalan at ilang metro rin ang layo sa itinuturing na ‘salvage area’ kung saan madalas tinatapon ang mga biktima ng summary execution. Noong Disyembre 2010, natagpuan din sa nasabing lugar ang bangkay ng dalawang menor-de-edad na pinaniniwalaang sangkot sa mga nakawan sa Davao del Sur. Sa nabanggit ding lugar binaril at napatay ang isang babae na biktima ng rape.