CAVITE , Philippines – Hindi na umabot pang buhay sa pagamutan ang isang magsasaka makaraang pagbabarilin ito ng hindi pa nakikilalang suspek sa loob ng kanyang bahay, kahapon ng madaling araw sa Brgy. Aguado, Trece Martirez City, Cavite.
Sa ulat na nakalap mula sa tanggapan ni Cavite Provincial Director Sr. Supt. John Bulalacao ang biktima ay nakilalang si Eldefonzo Evangelista, 65 at nakatira sa nabanggit na lugar.
Batay sa ulat, dakong alas- 4:30 ng madaling araw ng maganap ang insidente habang ang biktima ay natutulog sa loob ng kanyang bahay ng katukin ng suspect.
Pagbukas ng pinto ay sumalubong dito ang mga bala ng pinakawalan ng suspect.
Isinugod sa General Emilio Aguinaldo Memorial Hospital ang biktima subalit hindi na ito umabot pa ng buhay.
Mabilis na tumakas ang suspect matapos ang isinagawang krimen.