MANILA, Philippines - Nakahanda si Lucena City PNP director P/Supt. Ramon Balauag na harapin ang reklamong inihain laban sa kaniya ng pamilya ng mag-amang negosyante na pinaslang noong Setyembre 4, 2011.
“Kahit saan kami makarating, I will face the investigation to prove my innocence,” pahayag pa ni Balauag.
Si Balauag ay lumantad kahapon sa Camp Crame at pinabulaanan ang akusasyon ng mag-inang Sofia at Christina Riego dahil sa kabiguan niyang aksyunan ang kaso.
Noong Martes ay nagharap ng kasong administratibo sa PNP- Internal Affairs Service (PNP-IAS) ang mag-inang Riego laban kay Balauag kung saan isinunod ang kasong kriminal sa PNP-Criminal Investigation and Detection Group (PNP-CIDG) dahil sa kabiguang arestuhin ang tinukoy na mastermind na si Percival Perido.
Sa salaysay ng mag-ina sa PNP-IAS, si Perido na retiradong pulis noong 2004 ay sinasabing kaibigan ni Balauag kaya hindi inaaresto sa kasong pagpatay sa mister ni Sofia na si Virgilio Riego, 61; at anak na si Joseph Riego, 27, sa Brgy. Gulang-Gulang, Lucena City.
Ipinaliwanag naman ni Balauag na hindi nila inaresto si Perido dahil walang matibay na ebidensya na magdidiin dito sa krimen.
Sinabi pa nito na dahil sa gusot na ginawa ng mag-ina ay nasira na ang tinutumbok ng kanilang imbestigasyon sa kaso na lumilitaw na ang malaking pagkakautang ni Christina ang motibo bagay na itinatanggi naman ng huli.
“We wish to emphasize na hindi namin tinulugan ang kasong ito, may pinu-pursue kaming lead, I will cross the bridge haharapin ko ang kaso, nevertheless pinatatawad ko silang mag-ina in the spirit of Christmas,” dagdag pa ng opisyal.