SAN FABIAN, Pangasinan ,Philippines — Bulagta ang isang miyembro ng Bahala na Gang na sinasabing naaktuhang nagnanakaw makaraang makipagbarilan sa barangay chairman sa gilid ng highway sa Barangay Tiblong sa bayan ng San Fabian, Pangasinan noong Biyernes ng hapon.
Kinilala ni P/Insp.Ferdinand Lopez, deputy policed chief ang napatay na si Virgilio Mina na nakipagbarilan kay Chairman Raul Abaoag, 46.
Lumilitaw na naaktuhan ni Abaoag sa kanyang tahanan si Mina na kinukulimbat ang ilang personal na gamit.
Nang mamataan ni Mina ang paparating na si Abaoag ay kumaripas ito ng takbo bitbit ang mga ninakaw na gamit subalit hinabol siya ng kabesa kung saan humantong sa barilan sa gilid ng highway.
Tinamaan ng ligaw na bala si Joven Baliba na lulan ng pampasaherong bus na pansamantalang humimpil sa nasabing lugar.
Naisugod sa Region 1 Medical Center sa Dagupan City ang mga sugatang sina Abaoag, Baliba at Mina subalit minalas na masawi ang huli.
Ayon pa sa pulisya, bago mamatay si Mina sa ospital ay naibigay pa nito ang mga address ng kamag-anak sa Catbalogan, Samar, Quezon City at sa bayan ng Dasol, Pangasinan.
Narekober ng pulisya kay Mina ang tatlong cellular phones, ilang piraso ng alahas at baril na ginamit sa pakikipagbarilan kay Abaoag.
Samantala, bineberipika ng pulisya kung lisensyado ang baril na ginamit ni Abaoag.