BALANGA CITY, Bataan ,Philippines – Nagkabutas-butas ang bahay ng isang reporter ng national tabloid makaraang ratratin ng mga 'di-kilalang kalalakihan kamakalawa ng gabi sa Sitio San Rafael, Barangay Tuyo sa Balanga City, Bataan. Basag ang mga salamin ng bintana, mga gamit sa bahay ni Nerlie Ledesma, reporter ng Abante at presidente ng Tagnihao Homeowner Association. Dakong alas-10:40 ng gabi nang gulantangin ng sunud-sunod na putok ng malalakas na kalibre ng baril ang nasabing bahay subalit wala namang nasawi o nasugatan dahil nasa loob ng kanilang kuwarto ang mag-asawang Ledesma at anak. Noong September 12 ay pinagbabaril din ang bubungan ng bahay ni Ledesma kung saan narekober ang 26 basyo ng M16 Armalite rifle habang patuloy naman ang imbestigasyon.