MANILA, Philippines - Pito-katao kabilang ang dating hepe ng pulisya ang iniulat na nawawala matapos na mahulog ang pampasaherong van sa Pared River sa bayan ng Baggao, Cagayan noong Biyernes ng umaga.
Sa ulat ni P/Senior Supt. Mao Aplasca, Cagayan PNP director, naglunsad na ng search and rescue operation upang hanapin ang mga biktima kabilang na si dating Ex-Baggao chief of police P/Chief Inspector Dominador Serquina.
Bandang alas-6 ng umaga nang mag-dive ang van sa may 20 metrong matarik na kalsada sa Sitio Goloran, Barangay Vitag Grande.
Naiahon naman ang van na pag-aari ni Serquina dakong alas-9 ng umaga pero nabigong matagpuan sa loob nito ang mga pitong pasahero.
Nabatid na pupuntahan sana ng Serquina ang kaniyang driver para mamasada nang maganap ang trahedya.
Samantala, aabot naman sa 57-pamilya ang naapektuhan matapos na umapaw ang ilog dulot ng malakas na pagbuhos ng ulan simula pa nitong mga nakalipas na araw. Joy Cantos, Victor Martin at Raymund Catindig