MANILA, Philippines - Patay ang Circulation Manager ng isang lokal na pahayagan matapos na pagbabarilin ng hindi pa nakilalang mga armadong riding in tandem sa naganap na ambush sa General Santos City nitong Biyernes ng madaling araw.
Idineklarang dead-on-arrival sa pagamutan ang biktimang kinilalang si Alfredo Velarde Jr. alyas Dodong matapos mapuruhan ng tama ng bala sa iba’t-ibang bahagi ng katawan.
Batay sa ulat, sinabi ni PNP Spokesman Chief Supt. Agrimero Cruz Jr., naganap ang pananambang sa biktima sa harapan ng Brigada News sa kahabaan ng Rosario Village, Mahogany Street ng lungsod dakong alas-3:50 ng madaling-araw.
Kasalukuyang nasa harapan ng kanilang upisina ang biktima nang biglang sumulpot ang riding in tandem at pagtapat dito ay pinaputukan ng sunud-sunod hanggang sa duguang bumulagta.
Pagbagsak sa lupa ay muli itong pinagbabaril ng mga suspek upang tiyakin na patay na ang target.
Ang mga suspek ay mabilis na nagsitakas patungo sa hindi pa malamang destinasyon.
Patuloy ang imbestigasyon ng mga awtoridad sa motibo ng krimen.