Rizal ,Philippines - Patay ang isang 7-anyos na batang lalaki habang sugatan ang ina at kapatid nito nang araruhin ng isang van na minamaneho ng isang Koreano sa bayan ng Angono, Rizal kamakalawa.
Ang nasawi ay nakilalang si Ace Briones, residente ng Purok 3, Zone 1, Barangay Mahabang Parang, Angono at isinugod naman sa pagamutan ang ina at kapatid ni Briones na si Leonisa, 35, at Jojo Albis.
Arestado naman ang suspek na si Choe Tae Han, 36, isang Koreano at pansamantalang nanunuluyan sa #915 Asia Wealth Town, Pasay City.
Batay sa ulat na nakarating sa tanggapan ni Angono chief of Police P/Supt. Ruel Vacaro, nabatid na dakong alas-4 ng hapon habang naglalakad ang mag-iina sa kahabaan ng M.L. Quezon Avenue, Barangay Mahabang Parang, Angono, Rizal nang mabundol ng Starex van (ZFE-836) ni Han.
Ang dayuhan ay nahaharap na sa kasong reckless imprudence resulting to homicide and serious physical injuries.