QUEZON , Philippines – Napaslang ang kondoktor ng pampasaherong bus makaraang barilin ng isa sa dalawang senglot na pasaherong lalaki na tumangging magpatiket habang binabagtas ang Maharlika Highway sa Brgy. Sto. Cristo ng bayan ng Sariaya, Quezon, kamakalawa ng gabi. Napuruhan sa ulo si Renato Penaranda, 58, kawani ng Supreme Bus Liner habang tinamaan naman ng ligaw na bala at naisugod sa Candelaria Hospital ang dalawang pasahero na sina Rommel de Lara at Leomar Sevina. Sa imbestigasyon nina PO2 Alnor Tagara at PO2 Fidel Gaja Jr. Lumilitaw na nilapitan ng biktima ang dalawang lalaki para tikitan subalit nagalit ang mga ito at nakipagtalo hanggang sa mauwi sa pamamaril. Tinamaan naman ng ligaw na bala ang dalawang pasahero kung saan sinamantala ng mga suspek na tumakas.