MANILA, Philippines - Patay ang isang 62-anyos na abogado matapos masagasaan ng sariling sasakyan sa Purok 6, Barangay Fili sa bayan ng Bayugan City, Agusan del Sur kamakalawa ng gabi.
Namatay habang ginagamot sa Bayugan City Hospital si Atty. Rolando Carlota ng Barangay 1, Poblacion sa bayan ng Tubya.
Sa ulat ng tagapagsalita ng Caraga PNP na si P/Senior Supt. Martin Gamba, nabatid na ipinarada ni Carlota ang kaniyang kulay berdeng Ford Ranger pickup (KCG 669) sa mataas na bahagi ng kalsada upang inspeksyunin ang gulong.
Gayon pa man, sa pagmamadali ay nakalimutan nitong patayin ang makina ng sasakyan kung saan habang sinisilip ang gulong ay umusad ang sasakyan at makailang beses na nagulungan ang biktima na nagtamo ng malubhang sugat sa iba’t ibang bahagi ng katawan.