CAVITE, Philippines —Isang balikbayan ang dinukot at natagpuang patay sa bayan ng Imus ng lalawigang ito habang nakaligtas naman ang 5-taong gulang na anak nito.
Ayon kay Cavite PNP director Sr. Supt. John Bulalacao, ang biktima ay nakilalang si Eric Sales, 36-anyos, balikbayan at sales manager sa Papua New Guinea at nakatira sa Dasmarinas City. Nakaligtas naman ang anak nitong si Osteen, 5-anyos, na kasamang dinukot ng kanyang ama.
Batay sa imbestigasyon, dakong alas-2:30 ng hapon ng makita ng ilang tricycle drivers ang batang si Osteen habang tumatakbo sa kahabaan ng Daang-Hari sa Barangay Pasong Buwaya.
Nalaman ng mga tricycle driver mula sa bata na pinatay ang kanyang ama sa loob ng kanilang kotse hanggang sa ipagbigay-alam sa pulisya saka pinuntahan ang sinasabi ng bata sa Summerpoint Subdivision sa Dasmariñas.
Nakitang patay sa loob sa driver’s seat ang biktima at may tama ng bala sa kanyang sintido.
Bago ito, inalarma ng pulisya na kinarnap ang isang Ford Focus na may plakang ZLE-207 na sinasabing sapilitang kinuha ng 3 armadong kalalakihan.