QUEZON, Philippines – Tatlo-katao ang iniulat na nagpakamatay sa lalawigan ng Quezon nitong Semana Santa. Si Danny, 16, ng Barangay 7 ay natagpuang nakabitin sa kisame ng kaniyang kuwarto dakong alas-6:30 ng umaga. Sa imbestigasyon ni PO2 Randy Buenaventura, matinding dinamdam ng biktima ang pagbagsak ng grado nito sa eskwelahan kaya hindi ito naka-graduate. Nakadagdag pa sa sama ng loob nito ang ginawang pagmumura sa kanya ng ina dahil sa labis na paninigarilyo. Samantala, dakong alas-8:30 ng gabi naman nang magbigti sa kanilang bahay si Lenito Parafina, 30, ng Barangay 10 na nakabitin sa kisame ng kanilang bahay. Ayon kay PO3 Aldin Ranola, tinapos ng biktima ang kanyang buhay upang takasan ang pabalik-balik nitong sakit sa pag-iisip. Nagbaril naman sa ulo si Rence Marion Deapera, 21, sa loob ng kanilang banyo dakong alas-6:35 ng umaga.