CAMARINES NORTE, Philippines — Dalawang tauhan ni Mayor Dominador Davocol Jr. ang iniulat na nasawi makaraang magsalpukan ang motorsiklo at kotse sa kahabaan ng kalsada sa Barangay Poblacion 2 sa bayan ng Basud, Camarines Norte kamakalawa ng hapon. Kinilala ni P/Insp. Antonio Perez, ang namatay na sina Rommel Andrade at Peejay Abad na kapwa nakatira sa Brgy. Matnog ng nasabing bayan. Lumilitaw na magkaangkas ang dalawa sa motorsiklo (ZJ9079) na patungong palengke nang mag-overtake sa isang multicab. Dito nakasalubong ng dalawa ang Toyota Revo (WMD 206) ni Edmundo Sumbillo, 28, nakatalaga sa Phil. Army at nakatira sa 2nd East, Tagaytay City, Cavite.