MANILA, Philippines – Nasa kritikal na kondisyon ngayon ang isang collector ng isang lending firm matapos itong pagbabarilin nang manlaban sa tatlong holdaper na naganap sa Cabangan Public Market, Cabangan, Zambales, kamakalawa.
Kinilala ang biktima na si Noeme Peralta, 43, money collector ng Four Leaf Fund Lending & Development Corp. at residente ng Brgy. Lapaz, San Marcelino ng lalawigang ito.
Nasa kritikal pa ring kondisyon ang biktima sa President Ramon Magsaysay Memorial Hospital sa Iba, Zambales sanhi ng tinamong tama ng bala sa ulo.
Naganap ang insidente sa nasabing palengke bandang ala-1:45 ng hapon.
Kasalukuyang hinihintay ng biktima ang kaniyang kasamahang si Galathea Villarma, 43, nang biglang lapitan ng tatlong holdaper na nakasuot ng bonnet at sumbrero na lulan ng isang motorsiklong walang plaka. Agad na nagdeklara ng holdap ang mga suspek kung saan ay pilit na inaagaw ang bag ni Peralta na naglalaman ng malaking halaga ng pera.
Nanlaban naman si Peralta, bunsod upang barilin ito ng isa sa mga holdaper na hindi pa nakuntento ay tinangay rin ang cell phone nito saka mabilis na nagsitakas patungo sa hindi pa malamang destinasyon.