MANILA, Philippines – Tatlo ang kumpirmadong patay habang 16 katao ang nasa kritikal na kondisyon makaraang bumaliktad ang kanilang sinasakyang truck na naglalaman ng kamote sa may kahabaan ng National Road sa may intersection sakop ng Barangay Ibis Bagac, Bataan kagabi. Kinilala ni Bataan Police Director P/Sr.Supt. Arnold Gunnacao ang mga biktima na sina Marites Llorente, 29; Emily Decepeda, 37, at Marivic Salazar, 32 habang inoobserbahan pa ng mga doctor sa Bataan General Hospital ang 16 katao. Sa imbestigasyon ng Bagac Police Station dakong alas-7 kamakalawa ng gabi ng mabilis na tinatahak ng naturang truck na may plakang WFA-414 na minamaneho ni Richard Tolentino, ang kahabaan ng National Road. Hindi nito napansin ang intersection hanggang sa mawalan ito ng preno at bumaligtad. Kasong reckless imprudence resulting to multiple homicide at multiple physical injuries ang isinampa laban sa nasabing driver na sumuko naman kaagad matapos maganap ang insidente at siya pansamantalang nakapiit sa Bagac Municipal Jail.