KIDAPAWAN CITY, Philippines – May kinalaman sa nalalapit na barangay at Sangguniang Kabataan elections ang pamamaslang sa isang barangay chairman makaraang ratratin ng ’di-pa kilalang lalaki sa bisinidad ng Barangay Pembalayan, Lambayong, Sultan Kudarat kahapon ng umaga. Tama ng bala sa ulo ang tumapos sa buhay ni Chairman Romeo Ariola Sombreto ng Barangay Pembalayan, Lambayong. Base sa police report, nakatayo lang sa harap ng Barangay Bagsakan ang biktima nang lapitan at pagbabarilin ng mga ’di-kilalang lalaki. Di-pa man gumugulong ang imbestigasyon at hindi pa naihahatid sa huling hantungan ay kaagad naman pinanumpa ni Mayor Florante Agduma si Datu Wanie Guialo bilang kapalit ni Sombreto.