MANILA, Philippines - Pinaulanan ng bala ng hindi pa nakilalang mga armadong kalalakihan na lulan ng motorsiklo ang bahay ng isang dating alkalde sa Poblacion Sur, Bayambang, Pangasinan nitong Biyernes ng gabi. Batay sa ulat, naganap ang insidente sa nasabing lugar bandang alas-11:45 ng gabi. Ayon sa imbestigasyon, bigla na lamang sumulpot sa lugar ang dalawang suspek na magkaangkas sa kulay pulang Honda 155 motorcycle. Pagtapat sa tahanan ni dating Mayor Leocadio de Vera Jr., ay bigla na lamang pinagbabaril ng mga suspek ang bahay ng pamilya nito. Matapos ang insidente ay mabilis na nagsitakas ang mga suspek patungo sa hindi pa malamang destinasyon. Wala namang iniulat na nasugatan sa insidente pero lumikha ito ng matinding takot sa panig ng pamilya ni de Vera. Kasalukuyan pang iniimbestigahan ng pulisya ang kasong ito.