KIDAPAWAN CITY, Philippines — Matinding problema sa pananalapi ang isa sa motibo kaya nag-suicide ang isang kasambahay sa tahanan ng kanyang amo sa Brgy. Onica sa Kidapawan City, North Cotabato kahapon ng umaga. Natagpuan ang nakabiting katawan ni Femily Galvez, 40, sa servants’ quarter ng bahay ng pamilya Malaluan sa Perez Street. Napag-alamang isinugod ang biktima sa Dr. Luis P Malaluan Hospital na pag-aari ng pamilya Malaluan. Ayon sa ulat, huling namataang buhay ang biktima nang dalawin siya ng kanyang mister. Matinding depresyon ang nagtulak kay Galvez para tapusin ang kanyang buhay, ayon kay SPO1 Moises Abril. ‘Di-inakala ng mister na magpapatiwakal ang kanyang misis kung saan noong dalawin niya ito kahapon, ay nangako siyang maghahanap ng pera para makabayad sa pagkakautang nila sa ospital na aabot sa P17,000.