MANILA, Philippines - Kamatayan ang sumalubong sa dalawang kamag-anak na lulan ng convoy ng alkalde ng bayan ng Lasam, Cagayan matapos na mahulog ang sasakyan sa bangin sa Tuguegarao City noong Lunes ng hapon.
Kinilala ni P/Senior Supt. Eliseo Tanding ang mga nasawi na sina Cheryll Serrano, 50; at Nora Cortez, 51.
Samantala, sugatan naman sina Romeo Alcaide, 46; at PO1 Renen Genoveza, 30.
Sa police report na nakarating sa Camp Crame, naganap ang insidente sa kahabaan ng Caggay Highway, Soldiers Hill 4 kung saan ang mga biktima ay pawang mga kamag-anak ni Mayor Marjorie Salazar.
Nabatid na sakay ang mga biktima ng Isuzu High Lander na may plakang UPF-158 nang bumulusok ang high lander pagsapit sa nabanggit na lugar habang patungo ang convoy sa kapitolyo ng Cagayan.
Ayon sa ulat, sumabog ang gulong sa likurang bahagi ng sasakyan kaya hindi nakontrol ng driver ang manibela kaya nahulog sa may 15 metrong lalim na bangin. With trainee Rafael Zapanta /Mary Joy Mondero