MANILA, Philippines - Dalawang alagad ng batas na magsisilbi sana ng warrant of arrest sa isang wanted person ang nasugatan makaraang sumabog ang granada na inihagis ng dalawang menor-de-edad na lalaki sa Purok Slaughter, Barangay Tinampaan, Cadiz City noong Father’s Day.
Isinugod naman sa ospital ang mga sugatang sina SPO3 Richard Teologo at SPO1 Jeffrey Contivida na tinamaan ng shrapnel mula sa sumabog na granada.
Lumilitaw na aarestuhin sana ng dalawang pulis ang suspek na si Raymund “Nono” Recla, 48, kaugnay sa kasong attempted murder kung saan may warrant of arrest na inisyu ni Judge Renato Munez ng Cadiz City Regional Trial Court Branch 60 noong Marso 22, 2010.
Gayon pa man, habang isinisilbi ang warrant of arrest ay hinagisan ng granada ang dalawang pulis ng mga anak ng suspect na sina Reymund Recla, 17; at Roland Recla,15.
Nabatid na hindi maatim ng dalawang anak ng suspek na pinoposasan ang kanilang ama sa kasagsagan ng paggunita sa Father’s Day.
Nagawa namang makatakas ng dalawang anak ng suspek habang naaresto naman ang kanilang ama.