CAMP BONNY SERRANO, Masbate City , Philippines — Isang biyudo ang nasawi matapos na ito ay pagtatagain ng kapatid na lalaki ng kanyang nililigawan kamakalawa ng gabi sa Barangay Canjonday, Baleno, Masbate. Nakilala ang biktima na si Robert Martin 42, biyudo, magsasaka at residente ng naturang lugar habang mabilis namang nakatakas ang suspek na si Allan Inopia, ng nasabi ding barangay. Sa ulat ng pulisya, naganap ang insidente dakong alas-10:30 ng gabi matapos na malaman ng suspek na ang biktimang biyudo ay masugid na manliligaw ng kanyang kapatid na dalaga. Nagalit ang suspek at hinanap ang biktima dala ang itak. Subalit hindi inaasahang nakasalubong ng suspek ang biktima hanggang sa magkaroon ng mainitang pagtatalo at humantong sa pananaksak ng una sa huli. Pinaghahanap naman ng pulisya ang tumakas na suspek.