MANILA, Philippines - Dalawa security guard na sinasabing supporter ng re-electionist mayor ang iniulat na napaslang habang dalawang iba pa ang nasugatan makaraang pagbabarilin ng mga ’di-pa kilalang lalaki na lulan ng motorsiklo sa Barangay Isidro, sa bayan ng Rodriguez, Rizal noong Biyernes ng gabi.
Sa report ni P/Senior Supt. Jonathan Miano, kinilala ang dalawa na sina Ricardo Rueda, 53, ng Brgy. Balite, Rodriguez at Isagani Pascual.
Nadamay din si Anna Clarissa Jimenez, 14, na nagtamo ng sugat sa kaliwang balikat matapos tamaan ng ligaw na bala ng baril habang si Genal Mar na kasamahan ng mga nasawi ay nagtamo ng mga sugat sa braso at pigi.
Nabatid na ang tatlong guwardiya ay pawang mga supporter ni Rodriguez Mayor Jonas Cruz.
Batay sa imbestigasyon ang insidente ay naganap sa Centellia Homes sa Brgy. San Isidro kung saan nagbabantay sa gate ng subdibisyon ang mga guwardiya nang dumaan ang magkaangkas na lalaki sa motorsiklo.
Galit na sinita ng dalawang lalaki na nagpakilalang mga pulis ang mga guwardiya dahil sarado ang gate ng subdibisyon kung saan nagkaroon ng mainitang pagtatalo hanggang sa umalis ang mga suspek.
Gayon pa man, bumalik at niratrat ng dalawang nakamotorsiklo ang nasorpresang mga guwardiya.
Pinaniniwalaang may kinalaman sa pulitika ang pamamaslang sa dalawang sekyu.