ZAMBOANGA CITY, Philippines — Tatlo katao ang sugatan sa mga pagsabog ng bomba sa magkakahiwalay na lugar sa lalawigan ng Zamboanga Sibugay kamakalawa ng gabi.
Sinabi ng tagapagsalita ng Western Mindanao Command ng Armed Forces of the Philippines na si Lt. Steffani Cacho na naganap ang unang insidente nang dalawang improvised explosive device ang sumabog bandang alas-8:00 ng gabi sa bayan ng Titay.
Sinabi ni Cacho na sumabog ang isang IED sa likod ng isang bakod ng kandidatong mayor na si George Castillo sa Barangay Poblacion. Ang pangalawa ay sumabog sa Barangay San Antonio sa naturan ding bayan.
Isa namang granada ang sumabog sa Poblacion, Kabasalan, na malapit sa Ipil, Zamboanga Sibugay na ikinasugat ng tatlong tao.
Inihagis ang granada sa harap ng bahay ng isang pulis bandang alas-8:30 ng gabi ng Huwebes. Pero tinamaan nito ang tatlong sibilyan.