CAMP DIEGO, Silang La Union, Philippines - Napaaga ang salubong ni kamatayan sa labindalawang sibilyan habang labing-isa naman ang malubhang nasugatan makaraang sumalpok ang mini-bus sa punong acacia sa gilid ng Maharlika Highway sa Barangay Palina sa bayan ng Pugo, La Union kamakalawa ng madaling-araw.
Kabilang sa mga nasawi ay sina Warlito Sayoco, Luiza Gasapos, Lydia Martin Atienza, Ynes Banes, Pamela Tanya Africa, Eleuterio Reyes, Liberia Reyes, Mikhael Reyes, Mercedita Reyes, Isabelita Reyes.
Ginagamot naman sa La Union Medical Center sa bayan ng Agoo ang drayber ng bus na Silvestre Binay.
Ayon kay P/Chief Insp. Jacinto Lipaen, hepe ng Pugo PNP, ang mga nasawing biktima ay kabilang sa 49 pasahero ng PGM Love Bus (RHE316 na nagsagawa ng Bisita Iglesia (visit of seven churches) sa Baguio City at papauwi na sana sa Sta., Rosa, Laguna nang makasalubong si kamatayan.
Ayon kay Rafael Valencia ng 911-On-Call Rescue team, na walo kaagad ang nasawi on the spot kabilang na ang isang nagkalasug-lasog ang katawan habang ang apat ay namatay naman habang isinusugod sa ospital.
Nabatid na nawalan ng preno ang bus habang pababa sa Marcos Highway kung saan hindi napansin ng drayber na pasalpok na ang bus sa punong acacia malapit sa hangganan ng Benguet.