MANILA, Philippines - Napaslang ang hepe ng assessor’s office na sinasabing asawa ng ex-vice mayor habang sugatan naman ang driver nito sa naganap na pananambang sa panulukan ng Sinsuat Avenue at Rosales Street sa Cotabato City kahapon ng tanghali.
Limang bala ng baril ang tumapos sa buhay ni Engineer Enrique “Ricky” Barroga na mister ni ex-Cotabato City Vice Mayor Cecilia Camello-Barroga na nagmamay-ari ng St. Benedict School sa Cotabato City.
Isinugod naman sa ospital ang sugatang drayber na si Joseph Deliciano habang nakaligtas sa tiyak na kamatayan ang assistant city assessor na si Remegio Daga.
Sa ulat ni P/Senior Supt. Willie Dangane, na nakarating sa Camp Crame, lumilitaw na lulan ng kulay pulang kotse (LDA 866) ang biktima nang harangin at ratratin ng motorcycle-riding gunmen.
Isinugod ng mga concerned citizen ang biktima sa Notre Dame Hospital subalit idineklarang patay.
Pinaniniwalaang may kinalaman sa trabaho ng biktima ang pamamaslang dahil hindi naman kandidato sa May 10 elections ang misis nito.