Rizal , Philippines — Natagpuan patay ang isang 47-anyos na lalaki na sinasabing campaign manager ng 1-Utak party-list sa loob ng kanyang kotse kahapon ng umaga sa bayan ng Taytay, Rizal.
Sa ulat na ipinarating kay P/Senior Supt. Jonathan Miano, Rizal police director, nagtamo ng tama ng bala ng baril sa ulo si Lucio Gamit ng #627 Crystal Street, Palmera 2 Subdivision sa Brgy. Dolores.
Ang bangkay ng biktima ay natagpuan dakong alas-11:30 ng umaga sa loob ng itim na Mitsubishi Adventure (XPR-750) na nakaparada sa parking lot sa Plaza Mall sa Kilometer 23 Ortigas Avenue Extension, ng nabanggit na barangay.
Ayon kay Roel Joji Aganos, 39, security guard ng DJA Security Agency, napansin niyang pumarada ang nasabing sasakyan dakong alas-8:10 ng umaga at namataang may kausap sa cell phone ang sakay nito.
Makalipas ang ilang oras ay laking gulat na lamang nito ng makitang nagkakagulo na sa parking lot at isang babae na nagngangalang Maria Sherly Posadas na nagpakilalang asawa ng biktima ang pilit na pinabubuksan ang naturang sasakyan.
Nang mabuksan ang kotse ay tumambad ang wala nang buhay na katawan ng biktima kung saan nagsasagawa ngayon ng masusing imbestigasyon.