CAMP SIMEON OLA, Legazpi City, Philippines — Isang ginang ang pinagtataga at napatay ng kanyang asawa bago nabaril at napatay din ng pulisya ang huli sa Labo, Camarines Norte kamakalawa ng gabi.
Hindi na umabot nang buhay sa Labo District Hospital ang biktimang si Junitha Villafria, 43, ng P-3, Brgy. Pang-Pang, Labo.
Hinihinalang selos ang nagtulak sa suspek na si Dionesio Villafria para paslangin niya ang kanyang misis.
Nasugatan naman sa insidente ang isang barangay tanod na si Angel Narido Jr.
Nauna rito, nakahiga sa kama sa loob ng kanilang bahay si Junitha nang biglang dumating si Dionesio at bigla siyang pinagtataga nito ng itak sa harap ng kanilang 10-taong gulang na anak.
Nakatakbo pa palabas ng bahay si Junitha kaya hinabol siya ni Dionesio. Nakasalubong ng naghuhuramentado nang suspek sa daan si Narido na kanya ring hinataw ng taga bagaman nakatakas ang huli.
Bumalik si Dionesio sa kanyang bahay at sinunog ito bago tumakas palayo pero nakasalubong siya ng nagrespondeng mga pulis na nagpaputok ng baril nang tangkain niyang sugurin ang mga ito.
Nasugatan ang suspek na hindi na rin umabot nang buhay sa ospital. Ed Casulla