MANILA, Philippines - Nilamon ng lupa ang dalawa katao habang dalawa pa ang nasugatan sa landslide bunga ng malalakas na pagbuhos ng ulan sa Barangay Valencia, Cagdianao, Dinagat Island, ayon sa ulat ka hapon.
Kasalukuyan pang inaalam ang pagkakakilanlan ng dalawang namatay na biktima.
Kabilang naman sa dalawa pang nasugatan ang 42-anyos na si Wendelito More na isinugod sa pagamutan para malapatan ng lunas.
Naganap ang insidente, may dalawang araw na ang nakalilipas, sa Purok 3 at Purok 1 sa Barangay Valencia.
Dakong alas-7:00 ng umaga nang unang maitala ang landslide sa Purok 3, Brgy. Valencia kung saan may anim na kabahayan ang natabunan sa insidente na ikinasugat ni More.
Bandang alas-11 naman ng umaga ng sumunod na magkaroon rin ng pagguho ng lupa sa Purok 1 ng naturang barangay at dito’y dalawang bangkay ang narekober habang isa pa ang sugatang nailigtas ng rescue team. Joy Cantos