MANILA, Philippines - Apat na pulis at isang rebelde ang napaslang makaraang tambangan ng mga pinaghihinalaang miyembro ng New People’s Army sa Crossing ng Barangay Antipolo sa Bulan, Sorsogon kahapon.
Sinabi ni Police Regional Office 5 Director Chief Supt. Ruben Padua sa isang panayam sa telepono na naganap ang insidente sa nasabing lugar bandang alas-11:30 ng umaga.
Kinilala ang mga napaslang na pulis na sina Inspector Jerson De Leon, SPO1 Johnson Gerola, PO2 Darwin Detoit at PO1 Ryan Padrique.
Ang napaslang na rebelde ay patuloy pang inaalam ang pagkakakilanlan, ayon sa opisyal. Isinugod naman sa pagamutan ang mga sugatang sina PO1 Frans Guiamos, PO1 Alain Lanuza at PO1 Alwin Baldano.
Nagsasagawa ng anti-criminality patrol ang mga elemento ng 509th Provincial Police Mobile Group sa pamumuno ni de Leon matapos na makatanggap ng impormasyon sa raid ng NPA sa bahay ni Garry Goyala, driver ni Rep. Jose Solis bandang alas-9 ng umaga sa J.P. Laurel, Bulan.
Gayunman, habang patungo sa lugar, pinaulanan ng bala ng mga rebelde ang nasorpresang mga pulis. (Joy Cantos at Ed Casulla)