CAMP VICENTE LIM, Laguna, Philippines – Pinaniniwalaang nabulabog ang mga engkanto kaya pinakarit kay kamatayan ang magpinsang lalaki na nagkayayaang mamingwit ng isda habang dalawang iba pa ang nasugatan makaraang lumubog ang kanilang bangka sa Laguna Lake noong Lunes ng hapon.
Namatay sa trahedya sina Edgardo Necesario, 23; at Rolando Catabay, 17, kapwa nakatira sa Purok 6, Brgy. Kaingin, Sta. Rosa City, Laguna, habang naisugod naman sa Sta. Rosa Community Hospital sina Ronel Getape, 19 at Jerson Niquinto, 21.
Sa ulat na nakarating kay P/Senor Supt. Manolito Labador, lumilitaw na nagkayayaang mamangka at mangisda ang magpipinsan sa Laguna Lake kung saan may ilang metro lamang ang layo mula sa kani-kanilang tahanan.
“Nagbibiruan pa nga ang magpipinsan na ‘yan, inuuga pa nila ‘yung sinasakyan nilang bangka bago pa sila pumalaot,” anang isang kamag-anak ng mga biktima.
Bandang alas-3 ng hapon nang magsimulang lumakas ang ihip ng hangin at alon sa lawa hanggang hampasin ang kanilang bangka at tumaob.
“Nakita ng mga kabarangay namin na kakaway-kaway pa sila sa laot kaya mabilis silang sinaklolohan, ” ayon sa isang nakasaksi.
Mabilis na nasagip ng kanilang mga kabarangay sina Getape at Niquinto samantalang sinawing palad naman sina Necesario at Cabatay.
“Kahit nung papalubog na si Rolando sa tubig nakaturo pa ang kanyang mga kamay sa akin na parang nagpapaalam na,” dagdag ni Ronel.
Ayon naman sa ina ni Ronel, matalik na magkaibigan at malapit na magpinsan sina Edgardo at Rolando na “kahit sa huli, hindi sila nag-iwanan”.