ZAMBALES, Philippines – Maagang kinarit ni kamatayan ang dalawang sibilyan habang siyam iba pa ang nasugatan makaraang salpukin ng mini-bus ng Korean-owned Hanjin Heavy Industries Const Co. ang likurang bahagi ng jeep kahapon sa Sitio Nagyantok bayan ng Subic, Zambales.
Ang dalawa na kapwa naipit sa pagkakasalpok ng bus ay sina Edgar Assuncion ng Barangay San Marcelino at Melva Carrion ng Castillejos, Zambales. Kinumpirma ni Taek Kyun Yoo, general manager ng Hanjin, na nananatili sa ospital ang kanilang mga sugatang kawani.
Sa ulat ng chief operating officer ng Zambales Transport Cooperative Inc. na si Efren Juan, lumilitaw na magkasunod na bumabagtas sa nabanggit na kalsada ang dalawang sasakyan nang biglang huminto ang jeep upang iwasan ang mga tumatawid kung saan hindi nakuhang ilihis ng drayber ng mini-bus (AVM 235) kaya nagtuluy-tuloy na sumalpok sa likurang bahagi ng jeep. (Alex Galang)