BAYOMBONG, Nueva Vizcaya, Philippines – Tuluyan nang ikinulong at kinasuhan ang magkapatid na pangunahing suspek sa pagpatay sa isang tinyente ng pulisya noong Miyerkules sa Solano, Nueva Vizcaya.
Kahapon, pormal nang inihain ang kasong murder sa korte laban sa magkapatid na Julius at Ronald Retonda na naakusahang tumaga at nakapatay kay Inspector Anselmo Dulin, 50, dating hepe ng Maconacon Police sa Isabela bago naging hepe ng intelligence section ng pulisya sa bayang ito.
Kamakalawa ng umaga nang dalhin sa himpilan ng pulisya ni Chairman Floro Velasco ng Barangay Bascaran si Ronald Retonda na sumuko sa kanya matapos tumakas nang mapaslang ang biktima.
Sa kasalukuyan ay magkasama ang magkapatid na nakapiit ngayon sa Solano Bureau of Jail Management and Penology matapos sampahan ng kaukulang kaso. (Victor Martin)