MANILA, Philippines - Dinukot ng tatlong armadong lalaki ang isang negosyante sa Barangay Marinaut, Marawi City kamakalawa.
Kinilala ang biktima na si Omar Aman Alomin, 36 anyos, residente ng nasabing lugar.
Batay sa report ng Lanao del Sur Provincial Police Office, dinukot ang biktima sa bisinidad ng tahanan nito sa Ba rangay Marinaut, bandang alas-4:00 ng madaling araw.
Patungo ang biktima sa Abubacar Mosque sa Barangay West Marinaut upang isagawa ang Suboh o dasal nang bigla na lamang sumulpot ang mga armadong kidnapper.
Walang nagawa ang biktima matapos itong tutukan ng baril at kaladkarin ng mga kidnapper pasakay sa kanilang behikulo. (Joy Cantos)