BATAAN, Philippines – Napaaga ang karit ni kamatayan sa magkapatid na batang lalaki makaraang pagsasaksakin ng kanilang ama na sinasabing nawala sa katinuan kung saan napatay naman ng mga pulis ang huli sa naganap na hostage-drama sa Barangay San Antonio, Bagac, Bataan kahapon ng madaling-araw.
Kinilala ng pulisya ang napatay sa saksak na mag-utol na sina Charles Daniel Arellano, 6 at Zhelwin Arelano, 3, habang ang ama na nang-hostage sa kanyang dalawang anak at napatay naman ng mga rumespondeng pulis ay si Arwin Arelano, 34, electrician na tubong Iloilo City.
Sa inisyal na ulat ng pulisya, lumilitaw na nawala sa katinuan si Arwin kaya nagawang pagsasaksakin ang dalawang anak sa loob ng kanilang kuwarto.
Kaagad naman rumesponde ang pulisya matapos na maipaabot ng hipag ni Arwin ang insidente.
Dito na nagkulong sa kuwarto si Arwin kung saan nagkaroon ng negosasyon para sumuko ang una.
Subalit sa hindi inaasahang pagkakataon ay sinugod ni Arwin ang mga pulis para saksakin kaya napilitang barilin. Naisugod pa sa Bagac Medicare Hospital si Arwin na nagtamo ng dalawang tama ng bala ng baril sa dibdib at ang dalawa nitong anak na batang lalaki subalit hindi na umabot pa ng buhay.
Napag-alamang si Charles Daniel ay nagtamo ng anim na saksak ng patalim sa iba’t ibang bahagi ng katawan habang si Zhelwin naman ay apat na saksak.