CAMARINES NORTE, Philippines — Sa halip na sa eskuwelahan mapunta ang isang matandang guro sa unang araw ng pasukan, pinaglalamayan na ito makaraang maaksidente habang sakay ng traysikel papauwi sa Barangay 2 sa bayan ng Daet, Camarines Norte.
Namatay habang ginagamot sa Bicol Medical Center sa Naga City, si Maria Candelaria, 64, ng Lalawigan Elementary School sa bayan ng Mercedes.
Nabatid sa kamag-anak ng biktima, na posibleng naisalba pa ang buhay ng guro kung nabigyan ng agarang lunas sa Camarines Norte Provincial Hospital kung saan hindi agad pinagamit ang ambulansya upang madala agad sa Naga City dahil sa sinasabing kawalan ng pampagasolina.
Sa record ng pulisya, ang biktima ay sakay ng traysikel ni Erwin San Juan noong May 28 nang mahagip ng dyip ni Salvador Matira sa panulukan ng J. Lukban Ext. at Dulongbayan Iraya sa Brgy 3-Daet bandang alas-4 ng hapon.
Naisugod sa CNPH si San Juan habang kritikal naman ang guro kung saan binawian ng buhay matapos madala sa Bicol Medical Center.
Posibleng magsampa ng kaukulang kaso ang pamilya ng biktima laban sa pamunuan ng Camarines Norte Provincial Hospital. (Francis Elevado)