SANTIAGO CITY, Isabela, Philippines – Isang Belgian na dating militar ang nagpakamatay sa pamamagitan ng pagbaril sa sentido makaraang mapatay niya ang sariling misis sa bayan ng Iguig, Cagayan ayon sa ulat ng pulisya kahapon.
Ayon kay P/Senior Inspector Wilfredo Dupaya, hepe ng Iguig PNP, nakilala ang dayuhan na nagbaril sa sarili na si Constant Van Girt, 60, mula sa Belgium at ngayon ay residente ng Barangay Minanga Norte, Iguig, Cagayan.
Sa inisyal na imbestigasyon ng pulisya, unang binaril ni Girt ang kanyang asawang si Rosaly De Vera Girt, 37, sa loob ng kanilang tahanan nang magtalo ang dalawa kaugnay sa pinaghihinalaang karelasyong lalaki ng kanyang asawa.
Gamit ang baril na 9mm ay pinaputukan din ni Girt ang kanyang sentido matapos makitang bumulagta ang kanyang asawa.
Idineklarang patay sa ospital ang Belgian habang ang asawa nitong si Rosaly ay namatay din dahil sa tama ng bala sa ulo.
Nag-ugat ang pagtatalo ng mag-asawa matapos sitahin ni Girt si Rosaly kaugnay sa isang lalaki na pinaghihinalaang karelasyon at kausap pa sa telepono. Samantala, iginiit naman ng anak ni Rosaly (sa kanyang unang pamilya) na ang pinag-uusapan ng kanyang ina at ang nabanggit na lalaki ay may kaugnayan sa negosyong patahian. (Dagdag ulat ni Joy Cantos)