CAMP SIMEON OLA, Legazpi City, Philippines – Hindi na umabot pa ang tatlong taong gulang na batang lalake matapos masagasaan ng gulong ng isang truck kamakalawa ng hapon sa Barangay Buyo, Virac, Catanduanes.
Nakilala ang biktima na si Elbert Quintal, residente ng naturang lugar.
Sumuko naman sa mga awtoridad ang driver ng truck na si Herman Malinana, 43, may asawa.
Nabatid na, bago naganap ang insidente, iniaatras ni Malinana ang trak papasok sa isang garahe nang bigla na lamang magsisisigaw ang ilang mga residente na unang nakapansin na nasagasaan ang biktima.
Kaagad naman na isinugod ng drayber ang biktimang sa pagamutan subalit hindi na ito umabot pa ng buhay doon. (Ed Casulla)