BALAGTAS, Bulacan, Philippines — Brutal na pinatay ng isang 15-anyos na lalaki sa pamamagitan ng asarol ang kanyang tatay matapos na makipagtalo ang huli sa una. Ang biktimang si Levy Pascua, 60 anyos, residente ng Kalye Pogi, Barangay Burol 1 sa bayang ito ay pinatay sa palo sa ulo ng asarol ng kanyang anak na itinago sa pangalang Arthur.
Dakong alas-6:00 ng gabi nang madinig ng isang kapitbahay na humihingi ng tulong ang biktima at laking gulat niya nang makitang inihuhulog na ng suspek ang biktima sa balon. Nang arestuhin, ikinatuwiran ng suspek na wala siya sa sarili nang gawin ang krimen. Agad na inilipat sa Department of Social Welfare and Development ang suspek. (Boy Cruz)