Brutal na kamatayan ang sinapit ng isang 33-anyos na kumadrona na sinasabing pinagselosan makaraang saksakin at katayin ng kanyang lover na taxi drayber sa Barangay Busay, Cebu City kamaka lawa.
Kinilala ang biktima na si Dee Ann Alcala, habang arestado naman ang suspek na si Onizimo Taningco.
Napag-alamang si Taningco ay nangungupahan sa bahay ni Alcala at sinasabing kapwa nagkagustuhan.
Batay sa police report na nakarating sa Camp Crame, naganap ang insidente sa loob ng bahay ng biktima matapos itong komprontahin ng suspek.
Sa pahayag ng anak ng biktima, sinugod ng drayber na lango sa alak ang kanyang ina dahil sa napabalitang pakikipagkita sa dati nitong boyfriend na labis namang pinagseselosan ng suspek.
Nabatid din na tumang ging makipag-usap ang biktima sa suspek na senglot kaya nagalit ito at kinuha ang patalim saka ilang ulit na inundayan ng saksak ang kumadrona.
Sa presinto, iginiit ni Taningco na 6-buwan na silang may relasyon ng biktima at hindi na ito dapat na makipagkita pa kahit kanino lalo na sa dating kasintahan.
Nahaharap ngayon sa kasong murder si Taningco na nakakulong sa detention cell ng Cebu City PNP. (Joy Cantos)