ORMOC CITY, Leyte – Rehas na bakal ang binagsakan ng magbayaw makaraang arestuhin ng mga awtoridad sa isinagawang drug bust operation kahapon ng madaling-araw sa Sitio Cambiting sa Barangay Naungan, Ormoc City.
Kinilala ni P/Senior Insp. Vergilio Bayen-on, ang mga suspek na sina Faustino “Teting” Ceniza, 49; ang bayaw nitong si Ramil Itang na kapwa naninirahan sa nabanggit na barangay.
Napag-alamang sinalakay ng pulisya ang bahay ni Ceniza sa bisa ng search warrant na inisyu ni Executive Judge Apolinario Buaya ng Ormoc City Regional Trial Court Branch 12.
Nasamsam ng mga tauhan ni Bayen-on mula sa suspek ang ilang peketeng plastic na naglalaman ng pinatuyong dahon ng marijuana at ‘di-nabatid na bilang ng rolyo ng marijuana
Base sa record ng pulisya, ang asawa ni Ceniza na si Isabel ay kasalukuyang nakapiit din sa provincial jail matapos makumpiskahan ng isang kilong marijuana sa pantalan ng Isabel, Leyte noong 2008.
Naging saksi sa isinagawang drug bust operation sina Barangay Chairman Eu logio Dajab, Kagawad Ernesto Cañete, Kagawad Victorino Galo, Kagawad Rafael Taneo, hepe ng tanod na si Jose Sode at ang pangkat ng City Mobile Group sa pamumuno ni P/Supt. Eleazar Eglosa. (Roberto C. Dejon)