BULACAN – Isang 30-anyos na coach ng boksing ang iniulat na nasawi noong Linggo (Feb 1) makaraang lumaban sa paligsahan ng boksing sa Barangay San Martin 2, San Jose del Monte City, Bulacan.
Kinilala ng pulisya ang biktima na si Dante Destacamento ng Block 14, Lot 5, Purok 9 sa nabanggit na barangay. Sa naantalang ulat ng pulisya, lumilitaw na nahikayat ng mga residente na lumahok sa paligsahan si Destacamento na ang naging kalaban ay si Ronnie Mendoza, 30.
Napag-alamang sa kalagitnaan ng round 6 ay nakaramdam ng sakit sa ulo kaya itinigil ang boksing hanggang sa bumagsak sa luna si Destacamento.
Naisugod sa Ospital ng San Jose Del Monte saka inilipat sa Phil. General Hospital sa Manila para maobserbahan ang biktima sa anumang sakit.
Gayon pa man, matapos masuri ay pinayagan naman ng mga doctor na umuwi na lamang ang biktima subalit kinagabihan ay namatay na ito sa hindi nabatid na dahilan.
Sa muling pagsusuri ng mga doktor na ang biktima ay nagkaroon ng subdural (arachnoid meninges sa paligid ng utak) dahil sa tinamong mga suntok sa ulo.
Hindi naman nabatid kung may pahintulot ng kinauukulang ahensya ng lokal na pamahalaan ang ginanap na paligsahan na boksing (Romeo “Boy” Cruz )