ILOILO CITY – Pinaniniwalaang hidwaan ng dalawang pamilya kaya dinukot ang bagong silang na sanggol ng isang babae na nagpanggap na nurse sa loob mismo ng Aleosan District Hospital sa bayan ng Alimodian, Iloilo noong Biyernes ng umaga.
Napag-alamang kalung-kalong ni Rosalina Anino, ang kanyang apo na si Jurosh Portillo sa OB ward ng nabanggit na ospital nang lapitan ng isang babae na nakasout na nurse at naka-surgical mask bandang alas-9 ng umaga.
Sinabi ng nurse na paliliguan lamang ang sanggol kaya tuwang-tuwa naman at nag-atubiling ibinigay ni Anino.
Nabatid na si Jurosh na isinilang ni Rose Ann Anino, 19, ng Sitio Arca, Poblacion, ay kasalukuyang nagpapahinga sa recovery room ng nasabing ospital noong araw rin ‘yun at walang alam sa naganap na insidente.
Gayon pa man, naalarma ang pamilya Anino dahil makalipas ang dalawang oras ay hindi pa naibabalik ang sanggol na si Jurosh kaya nag-usisa sila sa ilang nurse sa ospital hanggang sa mabatid na nagpanggap lamang na nurse ang kumuha sa bata.
Sa inisyal na imbestigasyon ni PO2 Sandy Jarder, lumilitaw na posibleng ang pag-kidnap sa sanggol ay may kaugnayan sa alitan ng pamilya ng babae at lalaki
Inimbitahan naman ng pulisya ang ama ng sanggol na si John Edcel Portillo, 23, para magbigay linaw sa naganap na insidente.
Lumilitaw rin sa imbestigasyon na nagkakilala lamang ang dalawa sa pamamagitan ng text message hanggang sa magkarelasyon at mabuntis ang babae.
Nag-offer naman ng kasal ang lalaki subalit sa hindi nabatid na dahilan ay tutol ang pamilya ng babae, ayon pa sa ulat ni Jarder. (Ronilo Ladrido Pamonag)