CAVITE – Napatay ng isang ama ang kanyang sariling anak sa mismong kaarawan pa nito nang dahil lamang sa pagtatalo hinggil sa umano’y pagiging babaero ng una kamakalawa ng gabi sa Barangay Ligas 3, Bacoor sa lalawigang ito.
Kinilala ni Police Supt. Mario Reyes, hepe ng pulisya sa bayang ito, ang biktima na si Eduardo Lagria, 39-anyos, residente ng Calugdan Compound, Barangay Ligas ng bayang nabanggit. Mabilis namang tumakas ang suspek na si Elmar Lagira, 61-anyos.
Batay sa imbestigasyon ni PO3 Clarence John Erece, ganap na alas-8:30 ng gabi ng maganap ang insidente habang ipinagdiriwang ang kaarawan ng biktima sa pamamagitan ng inuman.
Habang magkausap ang mag-ama, naungkat ang umano’y pagiging babaero ng suspek na ikinagagalit ng biktima.
Nagkaroon ng mainitang pagtatalo ang mag-ama hanggang mabaril at mapatay ng suspek ang biktima.
Nagawa pang maitakbo sa pagamutan ang biktima subalit hindi na ito umabot pa nang buhay. (Cristina Timbang)